ලස්සන ඔය ඇස් දෙක ළඟ නිවෙනව මම මැණික... ( ශනිදා රෑ දහයට XX )

 .

.

දිස්වෙන      අග්ගිස්සක  අතු      පිබිදුව   මල්   ලෙසක

ගැස්සෙන  හිත අස්සක  තව තියෙනව   පෙම්   මතක

ලිස්සන   කවි  වැස්සක  සුව  දැනෙනව    හනි   හනික

ලස්සන  ඔය ඇස් දෙක  ළඟ  නිවෙනව  මම    මැණික...

--- දුමී ---

මුදා හුස්මද ඇගේ මළගම කඳුළු පිබුදුවෙ රතුව යුග නෙත... ( ශනිදා රෑ දහයට XIX )

 .

සිඳී ඇළ දොළ වේලි එකතුව නියං සිතුවම හැඩට ඇන්දා

බැඳී හැම තැන දූලි සුවඳම කටුක බවනම් හොඳට වින්දා

රැඳී සිටි ඒ ගමේ ගෙදරක මවක සෙනෙහස ලැබුණු හින්දා

රිදී පොකුණක අපට හමුවුණු  තවම මතකයි මැණිකෙ නැන්දා

සීත දුර රට හුදෙකලාවක දිවිය නිහඬව ගෙවෙයි පැද්දී

මෑත හිරු රැස නැගුණු මාවත කවුළු අතරින් පෙනී යද්දී

දෑත එක්කර අසිරි ලැබදුන් ඇයව සිහියට නැගී එද්දී

ඈත මතකය කඳුළු කරවයි නිතර නිතරම රිදුම් දෙද්දී 

දිනක සැමියත් මෙලොව අතහැර ගියේ යන්නට සමග රුදු මරු

හිතක දුකමයි එහෙත් ඇගෙ රුව දකින්නට අප සසර පිං කෙරු

දුරක වැඩපල කරන තිදෙනෙකි උස් මහත්වූ දුව පුතා දරු

නෙතක රතුවී පිපෙනවාමයි මතක් වනවිට කඳුළු මල් සරු

උදේ දහවල රැයද එකලෙස අහර සකසා දුන්නෙ අපටයි

හදේ තෙරපෙන ඇගෙ කථාවම කඳුළු සඟවා කිව්වෙ දුකටයි

නොදේ වෙහෙසක් රාජකාරිද කෙරූ තෙමසක ලැබුණෙ සතුටයි

නදේ මතකයි කීව ජනකවි හමුවුණේනම් පරන පිනටයි

එදා වැඩපල නිමාකරමින් යළිත් ආවෙමු පුරුදු ගම වෙත

බදා අප හැම නළල මත්තට හාදු දුන්නේ සනසමින් හිත

හදා මුවගේ සොඳුරු සිනහව දුක් සුසුම්වැල් ඉවත ගොස් ඇත

මුදා හුස්මද ඇගේ මලගම කඳුළු පිබිදුවෙ රතුව යුග නෙත

උන්න පෙර දින මැණිකෙ නැන්දේ දුන්නු සෙනෙහස තවම විඳිනෙමි

එන්න බැරි විය එහෙත් හිත තුළ කහට නැති බව නිතර පිළිගමි

දන්න නෑකම් අතර ඉහළින් නුඹව හැමවිට බැතින් රඳවමි

යන්න ගියමුත් දුකයි හැමකල් නිවන් සුව මම මෙලෙස පතනෙමි......

( සත්‍ය සිදුවීමක් ඇසුරෙන් 2019 දී නිර්මාණය වූවක් )

--- දුමී ---

සුවඳයි හැඩයි ගැළපුණු සුදු නෙලුම් මලක් ( ශනිදා රෑ දහයට XVIII )

 

.

සිහින් හඬින් ඔබ අමතන   කථාවට

හිතින් වසඟ විය සුන්දර      ලතාවට

මුවින් සුදට දිලිසෙන මුතු     මනාවට

මෙමන් සැනසුනා සුන්දර     හිනාවට

මතකයි සුන්දරයි සිහිවෙන විටදි       බිඳක්

සතුටුයි දරන්නට බෑ හදවතට       ගොඩක්

සත්තයි පළමු වර මා ඔබ දුටුවෙ        දිනක්

සුවඳයි හැඩයි ගැළපුණු සුදු නෙලුම්  මලක්

රැඳුණා සතුට ඔබ මා ළඟ ඉද්දි                  ගොඩක්

ලැබුණා වගෙයි කතරට මල් වැස්සෙ         පොදක්

බැඳුණා දෙසිත් ඉඟි බිඟියෙන් සෙනෙහෙ    බවක්

හඳුණා ගන්න තව කුමටද වෙනම                දිනක්...

--- දුමී ---

( සේයාරුව : මුහුණු පොතෙන්.)

කවි දිය බත් එක්කමයි - ප්‍රේමය නම් සොඳුරුමයි.... ( ශනිදා රෑ දහයට XVII ) .......

 

.

දවසක උදයේම

කවි දිය බත් තනියෙන්ම

හදලා හොඳ රසටම

කමුද අපිත් සතුටින්ම

ඉතිරි රෑ බත් ගෙන

කැට ගතිය පොඩි කරමින

බඳුනක් ගෙන දමමින

වැඩය අරඹමු නටමින

පොල් ටික ගාගනූ

ඉන් පසු එය මිරිකනූ

බත් බඳුන අරගනූ

කිරි ටික දැන් දා ගනූ

අමු මිරිස් කරලක්

නැතිනම් තව කිහිපයක්

කපා සිහින් හැඩයක්

දමමුකො ගන්නට සැරක්

රතු ළූණු අරගන්

සෝදා සුද්ද කරගන්

කපා ඊට දාගන්

කඳුළු එනවිට පිහදන්

වේලිච්ච මිරිස්ද

පුච්චා පොඩි කරමින්ද

දැමූ විට පෙනුමෙන්ද

හොඳටම ඇත රසයෙන්ද

පොඩිවෙන්නට තලා

උම්බලකඩ එක්කලා

වටේ දෙස බල බලා

කන්න හොරෙන් හිනැහිලා

 

දෙහි ගෙඩිය කපලා

යුෂ ටිකකුත් මිරිකලා

ලුණුද හැන්දෙන් හලා

රසය බලමු හැඩවෙලා

දිය බත්ද හදමින්

එහි ඇති රසය විඳිමින්

එයාටත් තව දෙමින්

කමුද දෙන්නා නටමින්

උදේ රස කෑමට

සැදිය හැකි හැම මොහොතට

කඩේ වසක් වෙනුවට

මෙන්න තිබ්බා මේසෙට

වැඩ අදික කෙරෙනා

කෑමද අතපසු වෙනා

බඩ දැවිල්ලට මනා

සුවයකි මින් ලැබදෙනා

මුදලද ඉතුරුමයි

කාලය රන් හා සමයි

දෙන්නාම අසළමයි

ප්‍රේමය නම් සොඳුරුමයි.....