ගැඹුරු අරුතත් රුදුරු ගලකින් නෙලූ අරුමය හෙල කලාවේ.....
දුඹුරු පැහැගත් සුමුදු පහසින් දෙපා සුවමය වැලි තලාවේ
පිඹුරු පිටපත් මනසෙ රැඳෙමින් චන්ද්ර අර්ධය මැවු වෙලාවේ
නැඹුරු වන සිත් දහම් අරණෙන් නොයන බවමය වෙත මුලාවේ
ගැඹුරු අරුතත් රුදුරු ගලකින් නෙලූ අරුමය හෙල කලාවේ
පළමු කවයක නොවන සේ මුදු විසිර රඟනව ගිණි ලතාවන්
සිතමු මොහොතක විඳින මී බිඳු සසර දුක ලොව සැදි මනාවන්
දකිමු එකිනෙක දුවන සී සිඳු අතර ගජ ගව වෙති රටාවන්
දනිමු අරුතක රැඳෙන දේ රුදු සතර බිය බව දෙති මුලාවන්
ඉරෙන් පනදෙන හැඩය විහිදෙන ලියවැලකි නෙත පැහැර ගන්නා
බරෙන් මිරිකෙන භවය විඳවන ඉඟිපෙලකි සිත පැතිර තණ්නා
කිරෙන් දිය මැන සතිය හික්මුන හසරැළකි නැත නතර වෙන්නා
වැරෙන් දිරිගෙන අරිය මග යන පිළිවෙතකි ඇත නිතර පෙන්නා
සිහින් ලියවැල් ඇලෙන හැඟුමන් තුරන් වී යන හැඩය තියලා
නිවන් සිහිලැල් රඳන සියපත් මලින් පීදෙන රසය තවලා
දනන් හැමකල් ඇදෙන පිංවත් දමින් නෑවෙන සුවය සොයලා
බලන් කළුගල් මැවෙන දසුනත් සිතින් පේවෙන බැතිය වැඳලා......
--- දුමී ---
හැමදාම වගේ දුමිගෙ සුපිරි කවි...නියමයි 👌
ReplyDeleteස්තූතිය ගොඩක් සඳූ...
Deleteජයවේවා !!!
දුමින්ද, මගේ බිරින්දෑ නං කියන්නේ මට නං තියෙන්නෙ ගල් හිතක් කියලයි.
ReplyDeleteඑයාට දැන් කියන්ඩ ඕනේ 'බලන් කළුගල් මැවෙන දසුනත්' කොච්චර සුන්දරද කියල.
ජයවේවා!
Myself Hattor
බිරින්දෑවරු නොදනියි ඒ ගල් හිත අස්සේ ඔවුන්ට තිබෙන සෙනෙහස ආරක්ශාව කොපමණද කියා. ඒක තේරුම් ගත් දින මීට වඩා ලොව සොඳුරු වේවි.
Deleteඉතින් ස්තූතිය ගොඩක් හැට්ටරේ.
ජයවේවා !!!
👑️👑️
ReplyDeleteරජ ඔටුණු පැළඳීමට තරම් හෙල කලාකරුවාගෙ කැටයම් කලාව වටිනවා බොහෝ...
Deleteස්තූතිය ගොඩක් ප්රා. ජේ.
ජයවේවා !!!
කළුගලට පන දෙමින් සඳකඩපහන, එය වනන සවිස්තර කවිය අගේය. පද ගැලපුම බොහෝම අලංකාරයි දුමී, ජය!
ReplyDeleteහැමදාමත් මේ දිරිය බොහො වටිනවා.
Deleteස්තූතිය ගොඩක් ගල්මල්
ජයවේවා !!!
නියමයි.
ReplyDeleteස්තූතිය ගොඩක් ප්රසන්න.
Deleteජයවේවා !!!
කවියෙන් කරන ලද රසවත් පැහැදිලි කිරීමක්. හරිම අගෙයි.
ReplyDeleteස්තූතිය ගොඩක් ඔබට
Deleteජයවේවා !!!
මේ පර ගියහම දැක්කේ අනුරාධපුරයේ සහ පොළොන්නරුවේ සඳකඩ පහනවල් වල නිමැවුම වෙනස් කියල
ReplyDeleteඔව් අයියේ. එහෙම වෙනස් වෙන තැන් තියෙනවා. සමහර නිර්මාණවල හින්දු ආගමනය නිසා ගව රූපය ඉවත්කකර තිබෙනවා. සහ හැඩයත් පොඩි වෙනසක් තියෙනවා. ඒත් සඳකඩපහණේ මූලික අංගයන් ටික ඇසුරුකරගෙනයි මේ කවි පන්තිය ලිව්වෙ.
Deleteස්තූතිය ගොඩක් අයියෙ.
ජයවේවා !!!
ඔබ පසුකරමින් පිය නැගුවට හදුනනනා ලෙස
ReplyDeleteමතක නැතිද පෙර අතීතේ ගලකින් නිමවුන
හැම දින ඔබ මා හමුවුවට පන්සල අද්දර
සඳකඩපහනයි මා සැම හදවත් තුටුකළ......
කොළොම්පුරේ අසංග
Wow. ලස්සන පදවැලකින් කොළොම්පුරේ ඇවිත්. සතුටුයි.
Deleteස්තූතිය ගොඩක් කොළොම්පූරේ...
ජයවේවා !!!
"ඔයා ගේ හිත ගලක්"
ReplyDelete"නෑ අනේ ඒ උඩ සාක්කුවේ තියෙන සිගරට් පැකට් එක!"
නයා පෙනේ කරණ කල; ගැරඬියා කැබිලිති කෑලි පොලොවේ ගසන්නාසේ කවි නොලියමි!
.
හැමදාව වගේම රසවත් කවි වැලක්!
කවි නොලිව්වට ලස්සන කියමන් ලියනවානෙ😀
Deleteබැරි නෑ අයියේ. ලියලා බලමු...
ස්තූතිය ගොඩක්
ජයවේවා !!!
ඔබේ කවි නිතර කියවනවා වුනත් විරිතට කවි පිලිතුරු ලියන්නට අමාරු හින්ද මොකුත් නොලියා ඉන්නවා . ඉදිරියේදී වචනවලින් ලියන්නම්. ඔබේ කවි ලන්ඩන් කවියටත් , මුහුණු පොතේ කවි එකතු වලටත් යවන්න. එතකොට තවත් මාධ්ය දෙකක රසික පිරිසකට ඔබේ නිර්මාණ අගය කරන්න පුළුවන් . ඔබ කැමති නම් මේ දිගු දෙක ඔබට උදව්වක් වේවි . ඉදිරියේදී වෙනස් වැඩක් කරන්න හිතාගෙන ඉන්නවා. ඔබ කැමති නම් ඔබේ කවි ඒ වැඩේට ගන්න පුළුවන්. https://ahasgawwenehalokaya.blogspot.com/2022/04/blog-post_30.html, https://ahasgawwenehalokaya.blogspot.com/2021/10/blog-post_30.html
ReplyDeleteඇත්තෙන්ම දැනටමත් මුහුණු පොතේ කවි එකතු 20 කට පමණ එකතුවී කවි ලියනවා. ඉතින් මේ දැණුවත් කිරීම වටිනවා බොහොම.
Deleteඔබේ ඉදිරියේ කරන වෙනස් වැඩේටත් දායක වීමට කැමැත්තෙන් ඉන්නවා. ඒ පිළිබදව ඉදිරියේදී දැණුවත් කරනු ඇතැයි සිතනවා. එය මට සතුටක්.
ඉතින් ස්තූතිය ගොඩක් ඔබට.
ජයවේවා !!!
'ගැඹු රු අරුතක් රුදුරු ගලකින් නෙලූ අරුමය හෙළ කලාවේ'
ReplyDeleteසොඳුරු සිහිනය කලා කරුගේ සැබෑ වන විට හුද කලාවේ
මියු රු හඬකින් සියොතු ගීතය සවන් දීමෙන් වැලි තලාවේ
රුදු රු හදවත් වුවද තෙත් වේ වියැකි ගොස් මොහඳුරු මුලාවේ
ලස්සන කවිය.
Deleteස්තූතිය ගොඩක් ඔබට දයාවි තුමා..
ජයවේවා !!!