රස හොයන් ගියෙ හැර මට දියන් පිළිතුර.... කාව්‍ය චතුශ්කය ( ශනිදා රෑ දහයට V )

 

.

රඟ    බලන්     ඉඟ කර  නෙත හෙලන්     හිටි පෙර

රජ     කරන්    ලෙස ඉර        පෙම දරන් බොහො දුර

රති      දමින්   ගිණි සැර        විඳ දෙමින්       හිරිහැර

රස හොයන්  ගියෙ හැර         මට දියන්          පිළිතුර

.

අර්ථය :

නෙත් හෙලා ඉඟ, කර ආදී වත රූ රඟ බලා සිටි, මගේ ලෝකයේ හිරු ලෙස රජකරමින් සෙනෙහස පෙන්වමින් බොහෝ දුර ගිය, රති දම් විඳ විඳ එයම ගින්දරක් සේ හිරිහැර දෙමින්, අවසානයේ වෙනත් රසක් හොයමින් හැර ගියේ ඇයිදැයි මට පිළිතුරු දෙන්න .!!

සටහන : 

කාව්‍ය චතුශ්කය නම් වූ දුෂ්කර බන්ධන විශේෂයක්. 

ඔරලෝසු කටු කැරකෙන දිශාවට කියවිය යුතුයි.

සියළුම පේලිවල 1, 8 සහ 16 යන ස්ථානවල එකම අකුරක් තිබිය යුතු අතර එය අනිවාර්යයෙන්ම අපාය අක්ෂරයක් විය යුතුයි. 

තවද 4 සහ 12 යන ස්ථාන දෙකේද එකම අකුරක් විය යුතු අතර එය පේලි අතර වෙනස්විය හැකිය. එසේම ඒවා ලඝු, ගුරු, හලන්ත ගුරු  හෝ ප්ලූත හෝ විය හැකියි. 

--- දුමී ---

.