දිරි ලබා දුන් දෙවියණේ හිරු ඔබ නමින් මේ වන්දනා....( ශනිදා රෑ දහයට XIII)

 .

.

.

නුවන් සැනසෙයි දකින කෙත්වතු නීල පැහැ සළු අන්දනා

ගුවන් තළයෙන් දෙරණ සනහා වැටෙන වැහි සුව කැන්දනා 

පිනෙන් ඔබගේ ගමම පිබිදෙයි ගැමි සිරිය හැඩ ගන්වනා

එවන් තෙද ඇති දෙවියණේ හිරු ඔබ නමින් මේ වන්දනා

කිරි මවගෙ ගැබ මෝරවා නිති වාසනාවන් කැන්දනා

සිරි රැඳුණු මල් පොකුරු අබියස බිඟුන් රාවය නංවනා

පිරි ජලය ඇති දොළක කඩිසර දණ්ඩි රැඟුමන් පෙන්වනා

දිරි ලබා දුන් දෙවියණේ හිරු ඔබ නමින් මේ වන්දනා

බුලත් හුරුළු ගෙන මලින් පුදමින පැතුම් සිත් තුළ බන්දනා

දෙඅත් සිරසට තබා බැතියෙන් ඔබේ ගුණ සිහි ගන්වනා

හෙටත් ලොව වෙත කාරුණික වී වඩින තුරු දුක හංගනා

මහත් බල ඇති දෙවියණේ හිරු ඔබ නමින් මේ වන්දනා

--- දුමී ---